मलेसियाबाट म्यानपावरलाई नक्कली कागजात पठाउने ठग गिरोह सक्रिय

 

काठमाडौं : ठगी गिरोहले मागपत्र प्रमाणीकरणका नक्कली कागजात नेपाली म्यानपावर कम्पनीलाई पठाइएको भन्दै सतर्कता अपनाउन मलेसियास्थित नेपाली राजदूतावासले आग्रह गरेको छ । नेपाली राजदूतावास मलेसियाले शुक्रबारको साप्ताहिक फेसबुक कार्यक्रममार्फत सचेत रहन आग्रह गरेको हो । 

विभिन्न व्यक्ति तथा समूहबाट दूतावासमा विभिन्न कम्पनीका नाममा ‘मागपत्र प्रमाणीकरणका लागि कागजात अनलाइन प्रणालीमा प्रविष्ट गरेको’ भनी स्क्रिनसट गरी विभिन्न व्यक्ति तथा नेपालस्थित मेनपावर व्यवसायीलाई पठाउने तथा अपलोड गरेको स्क्रिन सटलाई इडिट गरेर पठाउने गरेको पाइएको दूतावासले बताएको छ । 
मलेसिया सरकारको गृह मन्त्रालय मलेसिया केडिएनले जारी गरेको एउटै केडिएन नम्बर देखाई झुक्याउने तथा केडिएन नम्बरलाई विद्युतीय माध्यमबाट टेम्परिङ इडिट गरी विभिन्न व्यक्ति तथा संस्थालाई आर्थिक प्रलोभनमा पारेर ठगी गर्ने गरेको दूतावासको भनाइ छ । 

मागपत्र प्रमाणीकरणसम्बन्धी कागजात सम्बन्धित रोजगारदाताले नै अनलाइन प्रणालीमा प्रविष्ट गर्नुपर्नेहुन्छ । तर  अनलाइन प्रणालीको युजर नेम र पासवर्ड अनधिकृत व्यक्तिहरूको पहँुचमा पुग्न गई रोजगारदाता कम्पनीको जानकारी वा सहमतिबिना नै मागपत्रहरू अनलाइन प्रणालीमा पेस हुने गरेको पनि दूतावासले बताएको छ । 
राजदूतावासले नक्कली कागजातबाट उत्पन्न हुने जोखिमको जिम्मेवार सम्बन्धित म्यानपावर कम्पनी र रोजगारदाता नै हुने हुँदा कामदारको भर्ना प्रक्रिया अघि बढाउनुअघि एकपटक सम्पर्क गर्न आग्रह गरेको छ । राजदूतावासले मलेसियास्थित रोजगारदाताहरूबाट आवश्यक कागजातसहित पेस भएका मागपत्र नियमित रूपमा प्रमाणीकरण गरिँदै आइरहेको भन्दै आधिकारिक र वैधानिक रूपमा आउने मागपत्र प्रमाणीकरणमा भने कुनै समस्या नरहेको बताएको  छ ।  नेपालीहरूको प्रमुख गन्तव्य मुलुकका रूपमा रहेको मलेसियामा हाल करिब ४ लाख नेपाली कार्यरत छन् । 

मलेसिया नखुलेको  म्यानुफ्याक्चरिङ क्षेत्रको रोजगारीका विषयमा नेपालीको धेरै चासो छ । केही समूहले म्यानुफ्याक्चरिङ क्षेत्रको डिमान्ड एप्रुभल हुन थालेको भन्दै रकम असुली गर्न थालेपछि केही समयअघि नेपाली राजदूतावासले म्यानुफ्याक्चरिङ क्षेत्रको रोजगारी नखुलेकाले सामाजिक सञ्जालका सूचनामा भर नपर्न आग्रह गरेको थियो ।  काठमाडौंका केही म्यानपावर कम्पनीहरूले मलेसियामा म्यानुफ्याक्चरिङ क्षेत्रको रोजगारी खुल्यो भन्दै अन्तर्वार्ता गरी रकम उठाउने गरेको जानकारी पुगेपछि नेपाली राजदूतावासले सामाजिक सञ्जालमा आएका जानकारी र समाचारप्रति  विश्वास नगरी दूतावासमा सम्पर्क गर्न आग्रह गरेको थियोे । मलेसियामा सेमी कन्डक्टर भनिने विद्युत् र इलेक्ट्रोनिक्स, पेट्रोलियम, रसायन, रबर र प्लास्टिक उत्पादनहरू, खाद्य, पेय पदार्थ, र सुर्तीजन्य क्षेत्र म्यानुफ्याक्चरिङअन्तर्गत पर्छन् । ती क्षेत्रमा ठुलो संख्यामा नेपाली कामदार जाने गरेका छन् ।